公民黨噚日公佈今周五嘅籌款晚宴詳情，除咗有「明哥與官場技安對唱」做壓軸外，原來仲有另一重頭戲，就係由蔡東豪捐出喺中環出名食蟹嘅「大班樓」一枱四位，並由公民黨陳淑莊全程「陪坐」兼點菜。
價高者得 陪食陪坐
買家可帶同兩位朋友同Tanya食飯，最重要拍賣官係一度同Tanya傳出緋聞嘅岑建勳擔任，由佢嚟公平公正咁去「拍賣陳淑莊」。
Tanya話，到𠵱家都仲未知自己「底價」係幾多，總之為咗個黨，唔介意「被拍賣」。喺周五晚宴上，Tanya仲夥拍曾志豪做場時事棟篤笑。會唔會扮Power Ranger企喺主家席扮「淨心奴隸」？Tanya話未知，總之一定會爆肚，希望大家開心。晚宴初步筵開40席，歡迎各方好友買枱。
負責籌款兼做晚宴司儀嘅毛孟靜話，萬眾期待嘅壓軸節目「明哥與技安」，由平機會主席周一嶽同黃耀明合唱《禁色》，原來有段古。話說梁家傑有次去聽音樂會，撞到周一嶽，傑哥即時上前邀請周一嶽同明哥合唱《禁色》，周一嶽好Pro咁話：「咁你畀個MMO（伴奏音樂）我。」向來識自彈自唱嘅公民黨湯家驊當晚亦會率領樂隊表演。
晚宴嘅拍賣環節有唔少好嘢，包括由陳方安生（Anson）送出其母親、國畫大師方召麐送出嘅字畫，仲有前政務司長唐英年送出金鐘莊園（Chateau Angelus）1990年嘅紅酒，一箱12支，每支市價逾5,000蚊，但唐唐就唔會現身。至於呢場晚宴點解唔邀請唐唐死敵狼英呢？傑哥就講回應得相當好喇，「佢話佢同泛民係敵我矛盾吖嘛！」
mailto:[email protected]