孫柏文睇番記錄，原來舊年年初回歸《蘋果》後至今，都未寫過白銀。作為對抗紙幣狂魔嘅白銀戰隊隊長，真係辛苦晒所有戰隊隊員！
我喺大約七年前，即2006年嘅3月6日，當時啱啱開始入行做財經演員，就叫大家「一注獨贏買白銀」。當日，白銀賣10美元一盎斯，我亦提供有10年有效期嘅120美元一盎斯目標價，即係升11倍。
喺06年我話過，以花旗國樓市為最嚴重嘅全球性信貸泡沫將會爆。亦喺爆咗之後，聯儲局為首嘅央行們，就會紙幣狂魔上身，瘋狂印鈔，而要保護手上資產購買力，就買白銀抗魔。
平均入市法掃實貨
目標價有效期𠵱家剩番兩年幾，我落筆呢刻，白銀價喺前幾日跌穿晒所有支持位，由我推介白銀後嘅2011年初，最高位差幾仙50美元一盎斯，跌超過一半，得番24個幾。
我亦話過，因為市場上有巨額拋空白銀嘅單位，要挾死佢哋，就要買實貨。因為當最大拋空白銀嘅單位係JP Morgan嘅時候，一旦佢唔夠貨畀人，政府就會宣佈所有紙白銀毋須實貨交收，令期貨及結構性產品嘅紙白銀同實貨會有差價，實貨嘅溢價，可以斷倍計。所以，買實貨係唯一成為白銀戰隊成員嘅方法，紙白銀唔算數。
今日我要再講白銀，係因為跌咗咁多，真係抵買。我多年來，都係叫大家一出糧，唔理乜價就買，即平均入市法。點解？因為白銀係每一次紙幣貶值，令資產價格上升之下，最後一樣爆升嘅嘢。
印鈔，令貴金屬大幅兼永久地升值，係一個歷史不斷重複嘅事，今次亦不例外。買咗白銀嘅戰隊成員，隊長不但冇放棄，仲要比七年前更有信心。想買實銀加入戰隊嘅朋友，可以喺facebook搵我。白銀會唔會再跌我唔知，不過，重申一注獨贏買白銀！
孫柏文
獨立股評人
http://facebook.com/shuen
本欄逢周二、四刊出