繼新世界發展（017）主席鄭家純同恒基地產（012）副主席李家傑表態反對佔領中環，嘉華國際（173）主席呂志和噚日亦表態，叫大家應該做生意搵錢，好讓經濟發展，大家安安定定搵兩餐。
「咪阻經濟增長」
城中大孖沙必然反對佔領中環，最好大家唔好搞咁多嘢，都係搵錢至上，如果有大孖沙行出來支持佔中就真係大新聞。首富李嘉誠最穩陣，話冇好答案，李家傑批評得最狠，指佔中係想攬住香港一齊死。
呂志和曾表明反對佔中，之後又推搪自己唔係政治人，唔評論，噚日出席中大呂志和臨床醫學大樓命名儀式再被人問就話，凡係妨礙經濟增長嘅活動，都唔應該支持，最重要係大家可以安安定定搵兩餐。
誤把李福兆當呂志和
講開84歲嘅呂志和，大家對佢頭戴賊仔帽嘅招牌look當然唔會陌生，佢戴帽唔係貪靚，只為禦寒，怕頭頂被風吹親染病。
上周罕有回港出席證券商協會晚宴嘅前聯交所主席李福兆，今次都戴咗頂賊仔帽，據聞當晚晚宴現場就有80後經紀有眼不識泰山，誤以為李福兆係呂志和，兩位同齡，戴埋頂帽確有幾分似。