舊年反日浪潮令喺中國做生意的日資企業好頭痕，只有Uniqlo好似無事發生咁，今年照樣喺上海開一間有史以來最大型的旗艦店，面積超過70,000平方呎，仲大過銀座的總店。
Uniqlo似乎以行動話畀大家聽，國仇家恨佢哋唔多擔心，照樣將中國市場，當作未來發展的重中之重。
不過海迪覺得，與其話Uniqlo的母公司Fast Retailing（FR）睇好中國，不如話佢冇得揀，就算冒執行上的風險，佢都要喺海外勁開舖。
因為FR都係日本央行放水的受害者，有三分之二收入仲係來自日本本土市場，日圓係咁貶值，收入縮水，與此同時佢有80%貨品是在中國採購，雙重夾擊下，margin好難冇壓力。
以Uniqlo做mass market計，純利率唔會超過10%。如果唔再極速谷大海外市場，恐怕增長故事短期會玩完。
有每年都和家人去日本玩幾轉的朋友仔，最近同海迪講，以前去日本郊區地方，周圍的環境、店舖都唔會變，到近期再去，連嗰度啲舖頭都執埋笠，佢覺得日本經濟已經差到落谷底。FR𠵱家每年要將海外分店數目增加30%以上，速度係「零售之王」Zara的一倍。真係有種盡地一煲的感覺。
海迪