無綫舊年嘅《香港小姐競選》由新上場嘅非戲劇製作總監余詠珊搞搞新意思，俾全港市民做評判選出嘅三甲，一人一票選冠軍，點知香港市民太踴躍普選，搞到電腦系統癱瘓，最後以評判嘅名次為準，張名雅冠軍后冠戴得唔穩，季軍朱千雪至係民選冠軍，當時全城鬧爆，搞到外事部副總監曾醒明要出嚟鞠躬道歉。
投票方法複雜
話咁快《2013香港小姐競選》又嚟，噚日余詠珊同張名雅、黃心穎、朱千雪，仲有最上鏡小姐岑杏賢、旅遊大使湯洛雯去咗尖東為海外招募活動宣傳，海外招募由今日開始直至5月4日，本地嘅靚女就可以緊接住喺香港報名。
舊年一人一票普選港姐爛尾，今年仲繼唔繼續呢？余詠珊噚日話都會繼續：「但會有啲改變，係同投票有關，唔止電話、網上投票，可能再多啲方法都未定。」但係投票方法咁多，會唔會更加容易出問題，到時搞到黐晒線呢？鍾意創新嘅余詠珊今年又再加新意，就係將停咗好多年嘅準決賽復活，余詠珊話：「加番準決賽想遊戲有啲改變，人數會係18至20人，約有10人入決賽。」另外，為咗吸引多啲女仔參加，外景會搵啲吸引嘅地方，但肯定唔會去打仗或者有禽流感個案嘅地區。
版主：陳基征
想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/