全城等金價跌，就好似等樓價跌一樣，等到頸都長。金價終於跌穿每盎斯1,400美元，要多謝大鱷索羅斯、塞浦路斯、兼各大投行聯手唱淡，昨日曾低見1,385美元，由2011年9月歷史高位計，金價足足瀉近三成。身邊親朋好友都問：「你買咗金未呀？」
究竟金價跌完未？大淡友里昂就估，金價已經跌穿重要支持位，唔排除下一站1,200美元見。睇得咁淡都不無道理，首先全球兩大黃金消費國中國及印度，前者積極肅貪，令消費大減；後者為了滅赤，限制黃金進口。黃金需求大大減弱，金價短期想大升都難。
美林睇升25%
金價急瀉，金礦及珠寶股難逃洗倉厄運，六福（590）昨挫7.5%，周大福（1929）跌4.4%穿10元關。論股價跌幅，兩者由年初高位下調兩至三成，論黃金貨品的對沖比例，周大福以70%遠勝六福的25%，即係周大福七成存貨已作對沖，就算金價大跌，對盈利都唔會有太負面影響，故周大福略勝一籌，美林睇升25%至12.50元。
周大福仲好識得做生意，諗到買珠寶送別注版Samsung Galaxy電話的父親節及母親節推廣，不過，要做孝順仔女，唔該要單件珠寶買滿20萬銀先有得送。無廿萬唔緊要，不如買一手周大福送畀父母作長線投資，都只係2,000蚊左右，一樣有心思！
瑪姬兒