咖喱牛腩，有辣有唔辣。牽牛同咖喱將總結每周球賽，見到抵讚嘅事，牽牛定必重重有賞，用幾百字大讚吓佢；但見到抵鬧嘅人，咖喱就會毫不留情，省佢一餐。
嚟到季尾，相信大家都會留意3月先發力嘅韋根，睇吓佢哋又點樣可以喺兩個月內護級成功。既然有球隊3月先開季，當然亦有啲球隊3月已經收爐，場場hea踢等收工。
近3季，拎完英聯盃嘅球隊喺3月就會自動收爐，英超成績大插水。10/11球季，伯明翰拎英聯盃前26戰6勝12和8負，勝率為23%，不敗率為69%；英聯盃後12戰2勝3和7負，勝率跌至17%，不敗率為42%。上季嘅利物浦喺捧英聯盃前25戰10勝9和6負，勝率40%，不敗率76%；捧盃後13戰4勝1和8負，勝率跌至31%，而不敗率暴跌至38%。當然，利物浦上季季尾仲要分心英足盃，所以英超成績跌到慘不忍睹。到今季嘅史雲斯似乎都走唔出呢個3月收季嘅魔咒，佢哋捧英聯盃前27戰9勝10和8負，勝率33%，不敗率高達7成；但贏完冠軍後嘅5場聯賽，只得1勝1和3負。
除咗英聯盃冠軍隊外，史篤城係季尾收油收得最誇張嘅一隊，佢哋唔係3月先hea，係1月就開始holiday mood，踢半季就等收工。喺今季頭20場聯賽，史篤城6勝11和3負，不敗率高達85%，但踏入2013年後嘅13場英超，佢哋只係拎到5分，1勝2和10負，不敗率跌到得23%。其實喺上季，史篤城下半季嘅成績都差過上半季，佢哋頭19場7勝5和7負，但下半季就得4勝7和8負。另外，諾域治喺2013年嘅聯賽都係贏得一場，頹勢拍得住史篤城。文：咖喱