咖喱牛腩，有辣有唔辣。牽牛同咖喱將總結每周球賽，見到抵讚嘅事，牽牛定必重重有賞，用幾百字大讚吓佢；但見到抵鬧嘅人，咖喱就會毫不留情，省佢一餐。
碼頭工人罷工風波未平息，小弟經常在面書睇到「花生友」嘅留言，批評呢班捍衞尊嚴嘅鬥士，好似睇到留言講：「咁辛苦點解唔轉工！」，又有留言講：「一更都有千幾蚊，好過好多香港人。」留言者無知基本上冇咩問題，最好笑轉頭佢又留言：「好慘呀，臨收工俾老細捉去開會，又蝕一個鐘！」
人工高低真係相對，好似曼城中場耶耶托尼，剛剛同球隊續約，周薪22萬鎊左右（約260萬港元），相比一般打工仔而言，耶耶嘅薪酬肯定「嘩嘩聲」！但睇過佢周日英足盃準決賽嘅表現，只有兩個字形容：「超值！」
耶耶高人一等嘅身材，加上強壯嘅身軀，擺佢喺中場，已經有震懾對手嘅能力；今仗所見，已經多次KO車路士嘅3人老鼠仔中場線，勇而不茅咁搶波。耶耶更驚人嘅唔單止防守，進攻都有一手，曼城第1個入球，就係多得佢引球推進，拉散車仔嘅防線，先俾拿尼斯有機可乘。耶耶仲有無窮體力，去到補時階段，更有腳波爆到落車仔底線傳中，只係阿古路門前失機，未能梅開二度，好彩都夠晉級，耶耶雖然人工高，不過今仗就差唔多足足做咗3名球員嘅工作，你話點有可能唔超值。
講番轉頭，巴塞隆拿水準呢兩年稍跌，同耶耶離隊不無關係；布斯基斯打防中都稱職，但硬淨程度唔係耶耶嗰皮，兜兜轉轉又要買番桑治番嚟，但級數更加差幾皮。身為阿仙奴球迷嘅我，又不禁要呻多次，當年高路托尼向雲格引薦弟弟耶耶，但雲格因為爭個幾百萬鎊，爭輸畀巴塞，呢個又係兵工廠一大遺憾。文：牽牛