比亞迪（1211）舊年純利跌九成，老闆王傳福應該日日諗緊如何翻身。內地中國企業家網噚日就引述比亞迪員工，話王傳福每日一早就開住架自家品牌F3DM返公司，做足成日，每到食飯時間，佢通常等班夥計食完，走得七七八八，先會一支公落員工飯堂開餐，仲要係坐埋一邊默默地食，認真孤獨。員工話，冇人會走過去搵老闆搭訕，指王傳福平日最鍾意同科研人員一齊研究呢樣嗰樣，總係覺得老闆無時無刻都喺度諗緊汽車技術問題，怕走過去搭訕會打斷佢嘅思路。咁又係呀，佢真係要諗清楚點樣搞番好盤數，向股神兼一眾小股東交代。