一個袋、一件衫，就算表面睇係普通款，但只要係Prada、LV等名牌，即時升價十倍，唔係都唔會有咁多人當印上名牌logo嘅紙袋係寶。
好似月初喺米蘭上市嘅筆記簿品牌Moleskine，一本極普通嘅單行簿賣百幾銀，市面上同類貨最多十幾銀。你可能覺得唔值，但的確有人願意畀呢90%溢價買一叠紙。公司去年收入7.8億元，按年增長16%，經營利潤率有41.7%，仲高過Prada。
正如Moleskine招股書話齋，佢哋唔當自己係文具商，而係賣身份同文化。拎住一本歷史悠久，連畢加索梵高都用嘅Moleskine代表乜？型囉！
以菲菲廣告界朋友為例，佢見客時一定帶住本Moleskine，但一揭開呢本表面好似用咗好耐嘅簿，內裡竟光潔如新，皆因「要嚟威啫，一本就夠啦。」Moleskine現時股價已潛水16%，去年歐洲收入增長放緩，未來話要擴大中國市場，以強國人買名牌最緊要豪嘅心態，呢個品牌想變紙黃金？難矣！
Fifi
本欄逢周二、四刊出