徐家傑奪金像獎最佳新演員，發言時有骨﹕「論演技，自問唔及前特首。」
我推介另一位官場中人，言論一樣有骨，奪最佳新演員當之無慚，就係消防處助理處長吳建志。上周香港電台的電視節目欣賞指數頒獎禮上，吳sir一身消防制服，突然指着胸前紅色名牌和紅色掛繩說，「我哋身上都有紅色，香港電台我哋支持你！」全場震驚，掌聲雷動。
江湖傳聞，消防處也不想空降管理層，就像廉署和海關一樣，都是空降首長，所以同仇敵愾，撐港台員工的編輯自主行動。
我覺得陳靜攞最佳女配角真係，真係唔抵囉。有乜理由唔係由陳淨心攞啫。你陳靜都係要食爆炸糖先有爆炸嘅效果，我地淨心BB一出口就已經好有爆炸力。
陳靜嘅爆炸糖令到男人好開心，陳淨心嘅爆炸演出，亦令香港人好開心，真係花生都剝多兩粒，睇得好高興。
最佳男配角鄭中基，飾演暴龍哥，餐桌上怒罵林雪，又不斷以「為你好、有你着數」的正面形象，推介各式牛歡喜牛鞭等等驚嚇食物。
這個角色，「愛港之聲」高達斌當之無愧。
「民主不是香港的核心價值」，「一人一票唔係普選」，「愛港之聲做的事就是公義」，這些言論，就等於蛇貓雞、兔頭、牛歡喜一樣核突難頂，香港人邊啃得落？
但難為高達斌同暴龍哥一樣，講得理直氣壯、臉不紅氣不喘，聽在港人耳中，就像暴龍哥說「識玩一定係×騾仔」，一樣嚇死你。
最重要是，暴龍哥不斷把港人不接受的牛歡喜硬要我們歡喜，唔食就話我哋唔俾面；「愛港之聲」不斷把港人不接受的土共維穩思想硬要我們歡喜，爭在未拎把黑星放在一旁威嚇矣。