唔少港人都係撈TVB師奶劇嘅汁大，好多劇集中，生活再艱難，劇中人都可以準時收工、等埋成家人開飯，劇情超現實，背景脫晒節。唔知TVB高層係咪睇中咗大家當電視係精神鴉片呢個特點，開始將超現實元素融入新聞度。
噚日消委會出版新一期《選擇》月刊，講超巿加價同基因改造粟米呢兩個大題目，全行聽見超巿加價呢，就個個追到氣咳，偏偏呢單嘢完全喺CCTVB新聞消失咗，唔單止《午間新聞》冇，連《六點半新聞》都冇，淨係播基因改造粟米。
近排《新聞透視》抽走碼頭工潮報道已經搞到滿城風雨，到底係TVB高層新聞判斷獨特過人，定係唔想大家為通脹而情緒受困？又或者刻意避開超市新聞？真係耐人尋味。