小馬雖然13年嚟首次缺席季後賽，不過唔代表佢哋今季餘下嘅常規賽都hea打；周日作客就以107:89擊敗黃蜂，獨取19分嘅「德國槍」奴域斯基，不但球員生涯總分達到25,000分，球隊勝率上番5成，終於可以如願剃鬚。
小馬喺1月嘅低潮期，幾位主力好似奴域斯基、卡達、卡文同OJ美奧，都許下承諾，球隊勝率上番5成先剃鬚，點知球隊戰績一直浮浮沉沉，幾位留鬚留到深山大野人咁，好彩皇天不負有心人，今場擊敗黃蜂後，成績上番40勝40負，佢哋終於有得剃鬚嘞！德國槍就最心急，賽後就喺一大班傳媒面前剃鬚，幾個月冇剃，奴域斯基嘅手法都冇生疏，唔使40秒，留咗幾吋長嘅鬚終於剃淨晒，回復番青靚白淨樣。德國槍事後仲講，為咗呢個打賭，老婆冇錫佢幾個月。雖然餘下兩場對小馬冇咩意義，但奴域斯基講明會認真應戰：「我哋會盡力贏埋兩場波，等球季收『咧』後，好好反省今季問題，為未來而戰。」
摘生涯25,000分
其實呢場波對奴域斯基都算係雙喜臨門，當第2節剩6分44秒，佢射入中距離，取得球員生涯總分達到25,000分，其實呢個紀錄都唔簡單，連埋佢歷來只有17名去到呢個里程碑，現役球員中，亦都只餘湖人嘅拜恩同塞爾特人嘅加尼特有呢個紀錄。小馬教練卡里斯利話：「奴域斯基嘅球員生涯簡直完美，今次只係佢嘅里程碑上，加多一點。」