林以諾專訪梁振英，好彩只在佢老哥嘅網絡電視台播，如果唔係其提問及梁振英嘅膠答案，肯定俾人惡搞。呢位牧師早期以捉鬼響朵，由ghostbuster轉行成為疑似spin doctor，乃近幾年之事，每逢有公眾人物形象出現危機，林以諾就會出現陪伴左右，好似倪震在酒吧孔雀開屏後，林兄便陪住佢，就近有兩位官司纏身人兄，一位志雲大師、一位風水大師陳振聰，都係由林兄幫手改變。志雲大師原本好似唔係基督徒，另一位小甜甜爭產案主角仲勁，高調傳教，話自己唔再係風水師，受浸後改名彼得。
政府拉攏基督教 吸納中產
林牧師之所以成為炙手可熱spin doctor，因為有宗教背景，以懺悔方式改善公眾人物形象，比上TVB《東張西望》專訪好100倍，至少唔會惹來過千市民投訴。而梁振英埋基督徒堆就肯定有着數，尤其本地主流基督教以依附權貴為取向，爭取幾十萬信徒，總好過單靠親中基層，而不少基督徒亦屬中產，有幾個富貴教會更特別多權貴。
現任政制及內地事務局局長譚志源、商務及經濟發展局局長蘇錦樑、特首辦主任邱騰華、前高官黃仁龍、林瑞麟、李少光、鄭汝樺、馬時亨全部同一系統，仲有立法會議員梁美芬、民主黨黃成智。
大家唔好睇小呢個基督教派系，前朝每星期有自己私下早禱會，互相支持，本朝在同志平權立法諮詢工作上，更裏應外合，否決有關諮詢工作，搞到同志團體好嬲，令平機會前主席兼行會召集人林煥光一肚氣。新主席周一嶽要推平權立法諮詢都好困難。
本地中產以基督教及天主教為主要信仰，天主教因受中梵關係影響，加上羅馬教廷反共，所以香港天主教對共產黨統戰冇乜反應，陳日君、李柱銘及肥佬黎等教徒更係泛民推手。新任教宗方濟來自耶穌會（S.J），而耶穌會在明朝已來中國傳教，明末清初已有近500個耶穌會傳教士，五十年代內地主要教區主教多係耶穌會士，直至被共產黨全面驅逐後，部份來港辦學，多屬愛爾蘭籍神父。政府從兩大教派爭取中產政治支持，當然首選基督教，尤其是佔領中環行動中，戴耀廷、朱耀明乃基督徒，用道德感召來爭取普選，要counter就只有發動基督教保守派。
梁振英其實搵得林以諾，下一個不妨同網上傳教紅人高皓正，一齊討論時下年青一代性行為，肯定仲爆。
添馬男