上屆特首曾蔭權透過外訪住盡頂級酒店，最後醜聞不絕，現任特首狼英去珠三角外訪，每日開支高過cheap曾一倍。而財爺鬍鬚曾噚日就喺網誌話，留意到最近社會關注官員外訪活動，因為開支涉及公帑，受到注視無可厚非，但同時強調外訪工作係好辛苦。查實曾俊華只係想「報定案」，因為佢又飛啦，嚟緊會去柬埔寨、緬甸、珠三角。
鬍鬚曾又以封建王朝明代嘅三保太監鄭和自比，話四出開拓海外貿易的工作自古已有。查實去年底政府已披露，新政府上任短短四個月，鬍鬚曾外訪已達21日、花費53萬，開支冠絕一眾司局長。鬍鬚曾就借用其他同事把口，大嘆外訪好勞碌，每日活動密密麻麻，落機即去開會，晚上又要飛。八方就套用天下老細嘅金句回敬鬍鬚曾：「咁辛苦，咁你咪唔好撈囉！」