有市民捐錢、送物資撐碼頭工人，有人就諗到搞份《碼經》撐罷工。呢份刊物並唔係講賭馬嘅馬經，而係內容同碼頭工潮有關嘅碼頭工人報。呢 份刊物由左翼廿一同社工學聯嘅同學仔一齊搞㗎，由4月1日開始，日日見報，內容有工人罷工故事、罷工最新資訊，仲有漫畫睇。負責製作嘅同學仔話，原來好多碼頭工人都有老花，所以印出嚟嘅《碼經》，字體要大隻啲，圖畫都要大幅啲。
《碼經》「創刊」兩星期，聽日就會改名做《大眾碼經》，除咗每日喺碼頭派發之外，仲會強化網絡版本，內容包括工人之間嘅笑話，又會有「百業撐工友」環節，每日搵一個唔同行業員工講吓點解撐碼頭工人，仲會每日介紹一個碼頭專有名詞，諗住拉近碼頭工人同大眾距離。呢份《碼經》內容咁豐富，不過喺談判中途閃人，之後走去投注站買馬嘅外判商，就不宜觀看啦。