【銅鑼灣】前晚銅鑼灣開平道好熱鬧，前女子組合2R嘅家姐黃婉君（Rosanne）同甘比，不約而同約咗屋企人喺Da Domenico開餐，晚上9點幾，Rosanne嘅混血牙醫老公Derek率先行出嚟，大肚老婆緊隨其後，兩公婆着住黑白間條情侶裝，招搖過市晒恩愛。
Race現身飯敍
懷有第二胎、6月就生得嘅Rosanne肚大如籮，胸部明顯脹奶升cup，佢呢胎都係囝囝，Rosanne得天獨厚肥胎唔肥身，同行除咗有Rosanne父母同兩個妹妹外，仲有一個老外猛男㖭，二妹Race自從同向佐分手後好少蒲頭，呢晚難得現身同家人享受天倫樂，唔知呢位老外猛男同佢屋企人係乜關係呢？可以一家親食飯。
大肚Rosanne同老公十指緊扣，佢哋一行七、八人齊齊行去停車場，過馬路時由於冇紅綠燈位，Derek好鬼緊張拖實老婆，表現體貼，佢哋抵達停車場後，Rosanne好熱情咁同老外猛男抱抱，就跟老公同親友上咗以Rosanne英文名RW做車牌嘅座駕離去。
採訪、攝影：徐錦池、楊浩賢、陳辰
