愛港力又出動,到《陽光時務》舉辦佔領中環論壇上搗亂叫囂,令人側目。環顧歷史上只有右翼法西斯政權,採用右翼暴力團體去對付左翼工人及工會團體,將左翼抹黑,製造惡劣形象,令一般中產及青年學生卻步。
內地維穩系統之手伸入香港,採用同樣手段,而且食髓知味,變本加厲。要對付呢班人有乜嘢方法?首先主流傳媒唔可以再作同謀者,大佬,香港有香港一套玩法,唔到你班左派暴民搞事,由於愛港力係搗亂為主,冇政見水平,所有公眾論壇及傳媒節目一概不邀請他們,以免被視為替呢班人背書。由於傳媒越報道,不論正面負面,總之有見報,就代表做咗嘢,所以但凡愛港力搗亂一概不報,等佢哋冇得見報,失去政治抹黑功能。
由於在香港維穩,無法好似內地由國保、公安迫酒店取消NGO預訂之會議場地,阻止維權人士聚會,所以最佳方法係「攬炒」。手法同對付法輪功一樣,用愛字頭團體去製造超大橫額,包圍法輪功陣地,迫政府一齊執法,將所有橫額拆除。搗亂佔中論壇,亦係泥漿摔角,向對方潑屎的「攬炒」策略,因佔中行動道德高地係非暴力,要通過文明方式對抗野蠻,且要召開多次及多場商討日,討論各普選方案,達至民間共識。愛字頭之搗亂行動,本質上係挑釁,令對方群眾一時衝動出手還擊,然後就報警搞大件事,令佔中行動形象受損。
以往點解又冇同類團體衝擊支聯會活動呢?一來支聯會集會參與群眾超多,幾十人起哄冇效用,分分鐘俾支聯會群眾包圍。華叔領導支聯會多年,重重防滲透搞事,所以一開始好注重義工組織,建立自己糾察隊,防止集會、遊行被搗亂。義工係支聯會核心,華叔視為戰友,臨終前遺言:「戰友我愛您們!」
佔中運動之風險係冇類似支聯會強大組織力,所以更加要識借力,日後訂場定先作保安考慮,首選教協,至少係泛民主場。第二點相,將凡曾經參與搗亂左派群眾點相,表明不歡迎進場。
若果主辦機構乃中立媒體,則要動員自己群眾撐場,呢類工作背後全部要有經驗人士或組織擔當策劃,唔可以任由佔中運動被推向暴力化。
學術界人士搞政治的活動,千萬不要頭巾氣,尤其對方來勢洶洶。
添馬男