唔覺唔覺美股同日股已升到中長線嚴重超買嘅階段，截至上周五美股早段，道指9周RSI去到86，係1996年以嚟最高；日經平均指數9周RSI都去到90.5，晉佳懷疑美日股調整前好難再升得多。
不過外圍幾強，中港股市都咁弱，暫時睇估值，又未見到資金回流中港股炒落後嘅誘因。睇怕美日股再升，中港股都係略微反彈；美日股跌，中港股都唔慌有運行，除非有突如其來嘅中國轉勢因素出現，否則都係中線有反彈、冇升幅。
升又升唔起，跌又跌唔落，呢啲時候，人人驚就買，人人興奮就沽，窄幅有窄幅炒法。另一個方法係靠stock pick，就算同一個行業嘅股份，質素好同唔好，表現可能差天共地。
有機一浪高於一浪
上期晉佳翻兜華能新能源（958），目標價由2元升到3元，至於同概念股份，大唐新能源（1798）最似樣，同樣可以受惠風電行業谷底反彈嘅趨勢。兩者最大分別就係風電業務嘅地區分佈，大唐新能源超過四成產能來自內蒙業務，華能新能源就唔夠四成。睇番華能新能源首季喺內蒙嘅發電量按年增長87%，表現相當好，亦係刺激股價上周五爆升嘅原因。
大唐新能源內蒙業務比重高，豈不是棄電問題改善進度快，見底反彈速度較華能新能源更高？其實大唐新能源上周五收市後公佈發電量，但欠缺比較數字，要稍後搵資料再睇睇。再唔係睇番股價表現，如果今日能夠成功突破1.65元，有機會形成一浪高於一浪嘅走勢，就證明市場同時睇好佢，到時都可以跟進。
至於龍源電力（916）又點？呢間公司唔少收入貢獻來自熱電，熱電業務改善，主要因為煤價成本下跌同埋電價上升，令利潤率擴闊，如果今年下半年內地通脹回升，熱電進一步加價嘅難度就增加，雖然煤炭運輸瓶頸慢慢解決，令煤價有排都好難上，但熱電業務因煤價跌令成本下降，仍好難稱得上長遠睇好，所以龍源始終不太like。
晉佳
本欄逢周一、三及五刊出