英格蘭球證界紅人卡頓保（Mark Clattenburg），喺上周六執法雷丁對利物浦嘅英超聯比賽中，又有爆嘴嘢發生；佢竟然喺半場時將紅、黃牌同埋記事簿漏咗喺更衣室，搞到下半場時幾乎「冇牌用」，認真冇鬼用！
38歲嘅卡頓保由25歲成為英聯賽歷來最後生執法球證起，就一向都新聞多多（見附表），而近期最為人熟悉嘅，就一定係被車路士嘅球員屈佢話講粗口同種族歧視嗰單嘢啦！唔知係咪呢件事搞到佢仲有心理陰影，定抑或係一向注重打扮嘅佢，喺上周六執法雷丁對利物浦嘅聯賽半場時，喺更衣室要換衫扮靚靚嘅關係；半場出嚟之後，佢竟然唔記得帶紅、黃牌同埋記事簿出場！
下半場開波先知蝦碌
最正嘅係卡頓保仲要完全唔知自己冇帶牌，喺下半場當佢想判罰侵犯史杜列治嘅雷丁中場古費利黃牌時，卡頓保左搵右搵，先知道自己冇帶牌，要勞動第4裁判攞副「士啤」紅、黃牌畀佢頂檔！
英格蘭球迷睇波時一向鍾意唱住「你唔知自己喺度搞乜鬼」（You don't know what you're doing）嚟揶揄球證，今次卡頓保嘅表現就真係應景喇！
利記失分多得雷丁門神
講番場波，利物浦嘅表現可以話同卡頓保一樣咁冇鬼用，坐擁謝拉特及蘇亞雷斯等巨星級球員嘅紅軍，作客九降嘅雷丁，竟只能互交白卷，距前4歐聯夢越行越遠，更令雷丁新帥艾堅斯獲得領軍以來嘅第1分；紅軍果然鍾意「劫富濟貧」！不過，紅軍領隊羅渣士賽後就死撐話利記球員已表現好好，只係雷丁嘅龍門阿歷士麥卡菲表現更神勇啫！羅渣士話：「面對咁神勇嘅對手門將，我哋嘅球員雖然已經好努力，但真係冇晒辦法。」