教育局成立一個免費幼稚園教育委員會，由公職王鄭慕智律師做主席，其他成員有19人，希望在兩年內就優化幼稚園教育，資助模式與幼師培訓等實施方案提出建議。鄭慕智係教育統籌委員會主席，前浸會大學校董會主席，對教育有深厚認識，由佢擔任幼教委員會主席，深慶得人，只怕佢老早忙到頭上出煙，再帶多一頂帽，時間唔知點應付而已。
教師工會人士如民主派教協及建制派教聯立即表示，「薪級表已是教育界共識，教育局必須表態」，即係話，未有其他建議之前，幼稚園教師必須與官津學校教師一樣，有不錯的薪酬水平。（繙譯：加薪呀！）
未及其餘，先講幼稚園教師劃一加薪，鄭慕智委員等唔講呢樣嘢，休想得到左右兩派教師工會支持，頭痛未？以此問一位消息人士，佢話：「頭痛嘅嘢有好多，唔止教師加薪呢樣，中小學有津貼學校、官立學校、直資學校、國際學校四大類，推行免費教育集中於官津學校，應付裕如，但現行幼稚園全部係私立，只分牟利與非牟利，他日如何實施免費教育，技術上係一個大問題。」
左丁山問：「咁，政府有冇可能辦官立幼稚園，津貼幼稚園（非牟利）？」消息人士話：「梗係冇啦，一來係變相國有化幼稚園教育，民間反對聲音會好大，二來政府搞官中官小已夠晒頭痛，絕無意志或企圖去辦官立幼稚園，搞津幼涉及體制改革，快不得，最好就係派學券，資助幼稚園學生。」唔，學券係一個方法，但好多幼稚園嘅學費好貴好貴，貴過大學學費，攞到學券（還要講銀碼）都讀唔到嘅噃，難道要學安老院咁，向幼稚園買位，俾學童入讀？但買得幾多呀？可能會釀成「官商勾結」風險㖭！消息人士話：「左丁山你諗得掂就唔駛勞煩公職王出馬啦，幼兒科與老人科同樣係好大嘅政治問題，講就易，推行起嚟就困難重重！」可惜梁特首唔相信市場機制啫，否則嘅話，講明每位三歲至五歲學童，每人得獲派價值5000元（可調整）嘅學券，其他一切免問，同時宣佈所有幼稚園可以係牟利，學校供求問題咪由市場解決囉！