近年支持本土電影意識抬頭，睇吓標榜本土嘅《低俗喜劇》幾收得就知。除咗買飛入場睇新片，𠵱家亦有機會重溫香港七、八十年代經典電影，好似《八彩林亞珍》、《猛龍過江》同《半斤八両》呢啲嘉禾代表作，都有得買飛入場撐，仲要40蚊一張飛咋。
叱咤影壇30幾年嘅嘉禾電影公司，製作投資電影超過600部，培育出李小龍、吳宇森等國際巨星同名導。香港電影資料館最近主辦「風禾盡起──嘉禾的盛世印記」，重現昔日港產片風光歲月，展覽廳變成戲院，分做五個影院展區，展出嘉禾電影經典場面、劇照等等；又按年份貼起29張電影海報，其中22張仲係文物嚟，好珍貴㗎。
為咗配合展覽，電影資料館3月至6月期間會放映63部嘉禾佳作，門票喺城巿電腦售票網有得賣喇。
