公民黨嚟緊慶祝創黨七周年，本周五會搞籌款晚宴。既然要揼人心口，晚宴節目點可以馬虎？晚宴陣容相當強勁，相信無論係港聞定係娛樂記者都相當有興趣。聽聞公民黨邀得力倡同志平權嘅歌手黃耀明同綽號「官場技安」、慣用歌劇腔唱歌嘅平機會主席周一嶽合唱。合唱乜嘢歌？就係以同志為主題嘅《禁色》囉，兩人仲係唱壓軸呀，到時一定令在場觀眾「忘不了你」。
公民黨今日會開記者會公佈晚宴詳情，聽聞除咗有「明哥與技安」之外，仲有兩位前政務司司長支持。第一位當然就係相當支持公民黨嘅陳方安生啦，第二位就係唐英年，佢將會送出靚紅酒拍賣。公民黨記住問清楚唐唐啲紅酒係咪真嘢，免得俾人有機會抽秤就唔好啦。