財經事務及庫務局局長陳家強上周二至五訪美，分別去咗芝加哥同華盛頓開一大堆會，其中一個會議係喺華盛頓聯儲局見聯儲局主席伯南克，聽聞局長由芝加哥飛去華盛頓一程遇到阻滯，差啲見唔到伯老。
等足七粒鐘先上機
陳家強今次已經係做局長以來，第三次同伯南克開會。佢先到芝加哥開會，之後再飛去華盛頓，準備喺11號早上見伯老，點知前一日芝加哥發出雷暴警告，佢跟同行兩位同事喺機場等極都上唔到機，一等等足七句鐘，晚上11點先有機位畀佢哋飛，仲係當日最後一班機。
局長咁先至趕得切喺11號早上同伯老開會，但故事未完，佢哋人係上到機，但行李上唔到，飛到去華盛頓機場先知。好在局長同好多經常周圍飛開會嘅賓架、老闆一樣，預早執咗啲乾淨衫跟身，咁先至冇人仰馬翻咋。