近年北上賺人仔的周海媚，近日回流香港拍攝娘家無綫新劇《神槍狙擊2013》，她與張兆輝有感情戲，海味強調跟上位花旦徐子珊對手戲不多，但卻傳出兩女爭戲份不咬弦，海味摸不着頭腦說：「真係唔知點解傳出嚟，我同子珊冇乜對手戲，不過大家見面都有講有笑，我又唔爭啲乜嘢，但求大家關係融洽，開工起嚟投入啲。」
戴耳機上鏡
海味表示自己性格簡單，不熱衷爭逐名利，她說：「我拍呢套劇，好多趣事，輝哥（張兆輝）封咗我做『烏龍王』，我成日外景會漏低嘢，手機都跌過幾次，好彩輝哥幫我執番，每次外景完，大家必問我係咪帶晒嘢先上車走。」訪問時，海味補一下妝，照了照鏡便應攝影師安排埋位拍照，她卻忘了除下耳朵掛着的藍芽耳機，烏龍王果然名不虛傳。
想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/