周日英超早場上演東北打吡，由紐卡素迎戰新特蘭。由於兩隊都要為保住英超席位而搶分，而始終對新特蘭新帥迪肯尼奧的實力存疑，故寧取有前鋒柏比斯施斯腳風順兼有主力復出的紐卡素W。（球賽編號：星期日18；有線200及300台7:00pm直播）
未計上周六賽果，紐卡素目前以32戰得36分排第13，而新特蘭則以31分排第17，兩隊來屆的英超席位都仍未穩陣；其中尤以黑貓的形勢較危急，故球隊早前解僱領隊奧尼爾，換來意大利名宿迪肯尼奧掌帥。
不過，迪帥始終沒有帶領英超球隊經驗，而他上仗首次帶隊鬥車路士，就先勝後敗，令士氣受損；加上今役有中場格力加特拿停賽，而射手史提芬費查又已提早收「咧」，就算前鋒丹尼格拉咸及後衞古拿已告復操，亦不宜看好。
紐記3將「復出」振聲威
紐卡素近5仗雖然只曾1勝，又剛於歐霸盃8強出局，幸好有前鋒柏比斯施斯當銳，連續3場有入球；其中前仗鬥富咸時，更於補時階段一箭定江山，為球隊士氣注下強心針。
今迎新特蘭時，紐卡素不單有在歐霸盃不符合上陣資格的中前場球員高法蘭復出，另一攻擊中場賓艾化及後衞史提芬泰萊都可能復任正選，攻守力將更強。可別忘記，東北打吡一向「打甩髀」，佔有主場之利的喜鵲，又豈會讓踩場的黑貓攞威呢？因此，紐卡素的單W及讓半/一的上盤都可取。文：吾中