【中環ifc】司馬燕舊年患胃癌要切除胃部，嚟緊仲要接受第五次化療，不過上個月慶祝50歲生日嘅佢，對人生依然好積極，仲話7月會同老公去荷蘭古堡再舉行婚禮，抗癌戰士呢個名可謂當之冇愧。前日下晝4點幾左右，見到司馬燕同兩個女性友人一齊喺中環ifc出現。當日天氣都唔算好凍，仲有唔少人着短袖衫行街，但係化療中嘅司馬燕顯然謹慎好多避免冷親，佢戴住冷帽同頸巾，加一件羽絨褸，近日禽流感肆虐，當然唔少得口罩，總之佢全身包到實一實。
兩女友陪等車
不過女士點都要靚嘅，所以司馬燕搽咗眼蓋膏，同行嘅兩位女士就好小心咁一左一右扶實佢行街。佢哋逛咗唔係好耐，司馬燕行得比較慢，行咗冇耐，兩位女士陪司馬燕去等的士，遇着交更時間，的士站大排長龍，等候期間司馬燕同其中一位女友好好傾，仲講到手舞足蹈。前後等咗大概十分鐘至有車，兩位女友送咗司馬燕上車之後就離開。
採訪、攝影：李志明
想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/