雖然華東地區不斷出現H7N9禽流感個案，F1上海站仍然如期上演，周五先進行兩次試車：第2次試車法拉利就最威水，巴西嘅馬沙（前）以1分35秒340做出最佳圈速，快第2位嘅蓮花車手拉高倫0.152秒，第3位係另一位法拉利車手艾朗素。西班牙嘅艾朗素輸畀馬沙，事後就講笑咁講：「今晚返到酒店會食唔落飯，瞓唔着覺。」試車都咁緊張？嚟緊排位賽同正賽咪仲激？（now671及672台今日1:50pm直播排位賽）至於紅牛嘅維特爾日前好夠膽，唔戴口罩參觀上海街市，其他車隊就緊張得多；好似麥拿侖，佢哋嘅公關講，車手同工作人員每晚返酒店前，都會評估健康狀態，好似探熱咁。蓮花經理安迪就呼籲車手要經常洗手，仲一早幫工作人員打晒最新疫苗。