【隔牆對論】
記：《蘋果》記者 蒙：職工盟總幹事蒙兆達
記：罷工基金籌款逾466萬元，有沒想過是次工潮，社會有如此反應？
蒙：真係預料唔到。今次市民係來自不同界別，聲援、捐錢嘅人，唔係我哋平日嘅社運人，呢班支持者唔少平時冇咩關心政治、社會、基層議題。
本身罷工唔係咁有鋪排同計劃，最初係箍住班工人，後來「機手」加入，壯大聲勢，殺傷力大咗，因為機手唔係咁易取代，要訓練兩個月。我哋同左翼21協調就一早開始，由學生幫手做問卷，所以一罷工已有學生參加，加上佢哋慣用facebook，令成個運動傳播更快更廣。
有個義工李小姐，有日帶咗一大袋百幾對拖鞋來，佢話係代表花園街嘅檔販；前兩日有個做小販嘅阿叔，一個人推咗兩桶水嚟，話驚大家冇清潔嘅水洗面，跟住仲攞咗五盒幸福傷風素，話工人有病可以用到，佢嘅收入可能比碼頭工人仲低，所有呢啲關心都傳遍社會唔同角落。
記：職工盟是否中途介入呢？
蒙：絕對唔係中途介入。2011年，有大批碼頭工人搵我哋碼頭職工會傾加薪，我哋工會逼到資方加人工，但都返唔到97年嘅水平，當時工友接受。2012年，我哋5月做問卷調查，收集1,500份問卷；6月開苦水會，數百工友出席去表達佢哋訴求；7月開記者會，講碼頭工人加薪訴求，但外判商、和黃、HIT都冇回應。
我哋一路都係不得要領先罷工，唔係霎時間爆出來。工聯會話做咗好多問卷，我哋當住400幾人嘅員工大會問，邊個收過工聯會嘅問卷，結果係：一個！工聯會解釋，原來問卷係畀司機做，咁講真係混淆視聽。
記：工聯會說，透過談判為爭取工人爭到不少於5％加幅，他們沒貢獻嗎？職工盟策略常是談判拉倒便罷工，這種談判有效嗎？
蒙：如果唔係我哋發動罷工，啲工人都唔知工聯會原來同個老闆傾緊。臨罷工嗰日，工人先知老闆原來話加薪「不少於5％」，咁即係幾多？呢個完全唔係可接受條件。我懷疑工聯會發放呢個訊息，係想叫番啲人開工。
工聯會一廂情願只透過談判去解決，變咗「河蟹工會」、維穩工具。如果在談判過程中，你唔能夠組織員工發動工業行動，根本就冇籌碼逼老細，所以我哋強調談判權同罷工權，係工人最後武器。工聯會強調繁榮安定，唔好搞大型工業行動、罷工，擔心影響經濟、政府管治，呢個就係建制派工會最大弱點，把口講到好好，實際政治掛帥，擔心阿爺詐型，所以小罵大幫忙。
記：是否希望工潮盡快完結？
蒙：我都唔希望工人風吹雨打、日曬雨淋，當然希望透過勞資談判解決，但我哋要兩手準備，唔可以任何條件都接受，今次行動係為尊嚴而戰。如果資方攞唔出誠意，我哋惟有同老細鬥長命，總之要攞番個尊嚴番嚟！
問題最終都係集體談判權，如果97年冇廢除到，有足夠代表性的工會一早入咗去同碼頭公司談判，唔使好似𠵱家等個老細出嚟談判咁辛苦。咁要問番點解97年投票時，當時工聯會副會長譚耀宗支持廢除，陳婉嫻點解唔見咗人冇投票、鄭耀棠點解棄權？
記：貨主批評貨運受影響，貨物甚至變壞。
蒙：我哋都同情貨主。但不滿嘅貨主應該向罪魁禍首嘅HIT追討，唔想重演罷工，貨主都應該畀番啲壓力HIT，要求建立一個好嘅勞資關係。
mailto:[email protected]