「當我哋撳一個掣．．．．．．敵人便會葬身火海！」呢類新聞係咪吹水唔抹嘴，大家心裏有數；不過身處英超賽場，落得場多數如同真正戰爭。今周重點再放喺下游唔贏冇命嘅球隊，維拉同新特蘭。
睇季尾嘅維拉波，真係好似打仗，一往無前，打死罷就，領隊林拔重用𡃁仔嘅結果，就係自2月起錄得4勝1和3負，排名越打越上。前仗主場拼盡，半場領先利記後莫氣反輸；上仗作客打敗心態老退嘅史篤城更見精采。箭頭賓迪基勁爆，下季勢難留係後話，今晚主場信維拉讓得起富咸平/半。
富咸今屆打法，只見貝碧托夫一人操控全隊進攻命脈，若球交不到他腳下發辦或射門，準會被這位「瀟洒哥」責罵一番；能打到中游，多因對手摸唔通呢隊「新富咸」嘅打法。這個陣式也嘥了好波之人拜仁雷斯。季尾達標下，呢班大哥作客戰意有幾多，小弟存疑。富咸還可能放眼下周中場打吡戰，加力招呼車仔，博更多掌聲。
次選取由「狂人」迪肯尼奧走馬上任嘅新特蘭。明日早場作客紐記演東北打吡，迪帥賽前要戰將一齊食飯一齊落場操波提升士氣，也講明今場係唔贏唔掂嘅戰爭；紐記戰頻、護級壓力稍減，兄弟波今場主場讓到半/一嫌多，下盤穩。
冷取阿仙奴𡁻季尾走樣嘅諾域治，出番韋仔同禾仔，就算後顧下周中大戰拖肥糖，今場都博淨勝兩三粒；應該好似北韓咁，打冧隻「雀」冇難度。
（下次見報日期：20/4）