【淺水灣】被高登仔戲稱做送禮勤嘅李克勤,佢嘅大仔立仁(Ryan)一向都好得意活潑,仲似足港姐媽咪盧淑儀個樣,所以好得人喜愛。唔經唔覺Ryan已經五歲,為咗小朋友讀小學唔好輸喺起跑線上,家長都會同佢哋報好多興趣班,盧淑儀都唔例外。前日4點佢由司機載咗去淺水灣酒店嘅商場,之後行咗去一間畫室睇嚟係接囝囝。
食薯片冇時停
盧淑儀企咗喺門口邊玩手機邊等,應該係未夠時間放學,佢仲不時望入去畫室。大概等咗十分鐘,老師拖住Ryan出嚟,Ryan身上仲圍住條有星星圖案嘅圍巾,避免畫畫時整污糟件衫。
盧淑儀見到囝囝即刻廿四孝慈母幫佢拎住個畫袋,跳紮紮嘅Ryan已經急不及待除咗塊圍巾,同媽咪講咗幾句後又跳跳吓入返畫室,睇嚟係同同學仔打招呼。入去玩咗一陣,Ryan又彈吓彈吓咁攞住包薯片出嚟,一路行一路食。之後就繼續跳吓彈吓咁同媽咪行返七人車,其間盧淑儀全程笑咪咪望住個仔,充滿慈愛。
採訪、攝影:楊浩賢、朱志聰
想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/