沙田陳太來電：「喂，睇你寫曼谷旅遊咁過癮，不如食餐晚飯聽你把口講古仔，搵埋幾位朋友一齊到沙田間新酒店食自助餐。」沙田有間新酒店？係邊呀？沙田已經有麗豪，Royal Park與沙田凱悅，有三間夠晒啦！沙田陳太話：「呢間新酒店都係名牌嚟㗎，叫做Courtyard by Marriott，就在石門馬鐵站附近，鄉議局總部行過啲。」
食咪食囉，左丁山在中環慣咗預先卜位，叫陳太訂咗枱先，點知佢話：「唔駛啦，酒店唔係在沙田市中心，唔多就腳，坐的士去就最啱，唔駛訂位喇啩。」咁老定？成班人去到冇位點算好？索性叫自己秘書去訂位，嘩！好誇張，酒店人員對秘書講：「對唔住，今個星期七日全滿，同你預訂下個星期好唔好？」沙田陳太叫食自助餐，係即興嘅啫，邊度會諗到咁長遠，既然即晚訂唔到位，於是拉倒。
沙田陳太不服，佢話呢間酒店自助餐收近四百元一位，幾貴吓，在沙田點會有咁多人去食？此乃一般想法，香港地藏富於民，左丁山對政府發表啲甚麼家庭收入中位數字，從來不信，啲人口普查，隨機抽樣調查，或者講人口，住宅面積就好準，但一講到家庭收入，邊度有人講真話㗎，打個七折都算對得住調查人員咯。沙田有不少中產階級，到呢間新酒店（中文叫做沙田萬怡，係Marriott屬下三星至四星酒店嘅品牌），一家三四口，吃一頓自助餐，連埋加一要千三至千八元埋單，唔算少，但餐廳晚晚爆棚噃，可見沙田消費力之高。
沙田陳太唔抵得，打多幾次電話去要位，冇就係冇啦，佢唔高興之餘，捉我地去沙田凱悅嘅中菜廳（沙田18）食北京填鴨嚟補數，一隻填鴨賣738元，先吃鴨皮，再吃鴨肉，後吃生菜包鴨鬆與飲鴨湯，都幾爽，係沙田18嘅招牌菜，到呢間餐廳吃飯，不可不試，其他特別菜式就係東莞地道小菜，如厚街臘味煎魚餅，東莞炒米粉，吃落幾過癮。左丁山係東莞人都唔知鄉下菜可以咁好味，七個人吃得飽飽，埋單係每人盛惠370元咁上下，與吃萬怡自助餐差少少，慳唔得幾多。