91年國際華裔小姐冠軍凌緣庭喺九倉（004）經過9年努力，噚日終於升做董事，證明唔係得個靚樣，真係睇得又打得。最重要係，以後佢嘅title必然係九倉董事，唔會係華置（127）主席劉鑾雄（大劉）前愛將了。
靚女變靚媽 41歲童顏
凌緣庭本身係新加坡人，選美後飛去英國完成大學課程，有特許測量師資格。佢2001年加入華置地產部，好快成為大劉愛將，三年後佢跳槽到九倉，一直負責管理銅鑼灣時代廣場。
其實自佢過檔九倉，大劉身邊又有甘比同呂麗君，大家都好少將凌緣庭同大劉拉上關係，之不過，凌緣庭相對低調，又實在太靚女，今年41歲，已經係媽咪級都保養得咁好，大家咪始終覺得佢係花瓶囉。
佢兩年前接受本報訪問時曾經呻過，都有後悔走去選美，又指樣靚喺地產呢行冇優勢，要付出好多倍努力先可以得到認同。
舊年佢獲委任為九倉旗下海港企業（051）非執董，由於只係非執行性質，所以都唔算係乜，佢噚日辭去海港非執董職位，入咗九倉做董事，今年基本薪金加埋津貼有328萬元，遲吓仲有花紅分，舊年就收到180萬花紅，佢嘅努力終於得到認同。
九倉老闆吳光正委任凌緣庭做董事其實都一舉兩得，一來多位靚女高層幫手，二來響應港交所（388）叫上市公司加多啲女董事入董事局，九倉𠵱家就有兩位女董事。
李華華
mailto:[email protected]