陳鑑林向來係立法會「投資王」，早前被揭政府再推辣招前放售大圍一舖位，套現8,500萬，同28年前155萬購入價計算勁賺54倍。雖然惹嚟偷步放舖之嫌，但陳鑑林心情未受影響，噚日喺金鐘中信海都宴請傳媒慶祝。
放售呢間舖後，佢手上已經無晒工商舖位，只剩住宅貨。記者乘勢叫佢分享投資心得，佢話樓市或者要到兩年後先至正常番，呢段時間手頭若有閒錢，揸股好過買樓，而佢推崇嘅股票清一色係中資，包括中銀、建行等，估唔到連投資都咁「愛國」。
愛將陳百里入咗政府做政治助理，觀塘砰石選區嘅空缺，陳鑑林決意推囝囝陳俊傑頂替，今日會陪住阿仔去報名。