法比加斯（右）喺呢場歐聯表現平平，喺下半場仲被換走，由美斯入替。法比仔踢唔出水準，心事重重，原來喺比賽嘅同時，大佢12年嘅女友丹莉娜就喺醫院努力，幫法比仔誕下女兒；而名都改好咗，就叫莉亞（Lia）。完場之後，法比仔急急腳趕去醫院探女友。
美斯表哥有番咁上下
美斯咁勁，話唔定同基因有關，因為佢表哥都好勁，早幾日都射入咗個靚波。美斯表哥叫拜恩古茲（Maxi Biancucchi、圖），今年28歲，效力巴西甲組球會維多利亞。過去嘅星期日，維多利亞對巴希亞嘅洲聯入面，佢喺51分鐘個人突破，殺入禁區，拉咗腳靚波，笠死對手網仔入，最後維多利亞以5:1大勝。
碧咸歐聯最後黃牌？
碧咸呢場歐聯冇得踢正選，當巴黎聖日耳門（PSG）被追成1:1後，佢先至喺83分鐘後備入替，最後只係拎咗張黃牌（左），咁就完結咗佢今季嘅歐聯之旅。咸哥下月就滿38歲，雖然佢話未諗住掛靴；但以佢咁高齡，下季仲可唔可以喺歐洲頂級球隊落班都成問題，所以呢場話唔定係咸哥嘅歐聯告別作。
