喺上年12月嘅時間，相信曼聯領隊費格遜一定估唔到尹佩斯會突然一沉不起，近期陷入球荒。或者有見及此，據講老費已經着手為下季物色入球機器，睇中馬德里體育會嘅前鋒法卡奧。要羅致法卡奧，最直接方法係畀高達4,700萬鎊（約5.6億港元）嘅贖身費買斷佢合約，據聞老費不惜割愛將「小豆」查維亞靴南迪斯作為交易籌碼，加錢換法卡奧返嚟。
一直以嚟盛傳曼城同車路士都打算喺今夏斟介法卡奧，點知日前突然傳出曼聯都有意加入戰團。法卡奧自從喺2011年由波圖轉投馬體會之後非常吃得開，至今已經入咗54球。始終今季加盟嘅尹佩斯已經年近30，最近又已經連續10場比賽冇波入，費格遜都要為下季陣容諗一諗。
根據法卡奧同馬體會合約，前者嘅贖身費係4,700萬鎊，老費嘅如意算盤係將身價值2,000萬鎊嘅小豆，再加2,700萬鎊條件畀馬體會。不過英超球會要達成呢樁交易，要先解決第三方有法卡奧擁有權嘅問題，後者經理人文迪斯目前佔有小部份法卡奧嘅擁有權。
曼聯20年前贏首屆英超
另外，不知不覺原來今年已經係曼聯贏得首屆英超20周年，當年今日，曼聯正係喺4月中2:1作客贏錫周三呢場經典戰之後過咗維拉頭升上榜首，再連贏最後5場聯賽成功封王。