華能新能源（958）噚日收市後公佈，首季發電量按年增長64.8%，較去年第三、四季嘅平均數字增長三成。花旗噚日開市前發表研究報告，話該股首季發電量增長五成。晉佳唔清楚兩者計算基準有冇唔同，重要嘅係增幅比花旗原先估計嘅五成更高，報告仲未調高盈利預測，目標價維持2.40元，家陣發電量勝預期，隨時有機會上調盈測同目標價。
花旗話公司發電量相對每股盈利影響嘅敏感度高，發電量每增長1%，每股盈利可增長4.8%。咁計第一季發電量比下半年平均水平增長30%，即係每股盈利增幅放大4.8倍，增幅去到1.44倍，首季每股盈利可以去到4.5分（人民幣．下同），如果今年其餘三季發電量keep住進度，市盈率就只得10倍，雖然係條死數，但點都比花旗未經調整嘅預測市盈率17.5倍低好多。
中長線料升見三元
晉佳舊年12月推介呢隻股，當時股價1.30元，目標睇2元，現價已超標一成。但睇完首季營運數據，原來2元係睇低咗佢。
內地09年開始大搞新能源粗放式投資，令個別地區供應過剩，唔能夠上電網而要棄電，呢part變咗零收入。不過，呢批零收入產能已經投運得七七八八，今年開始，新產能會較多投放喺冇限電問題嘅地區，而中央年初放寬風電企業投資冇棄電問題嘅地區，令發電量增長可以更長期維持。另外，棄電問題主要係電網唔匹配，雖然內地電網公司投資嘆慢板，但問題點都會慢慢改善。
不過最新營運數據顯示，棄電重災區、拖冧公司之前業績嘅內蒙區，首季發電量較舊年第三、四季平均數字，增長高達35.5%，改善棄電進度遠高過晉佳估計，要由頭計過數。由於未來有政策扶持，加上棄電問題改善得快，收入將大增，只要財務支出可控，現價計算今年市盈率跌到13倍唔難，加上打後增長可以持續，估值可更上一層樓，股價中長線升到3蚊唔過份，值得揸實。
晉佳
本欄逢周一、三及五刊出