早排Samantha睇到一個電視節目，講現時香港考生最驚科目，再唔係英文，竟然係中文。就連一位中學老師親身試考，其中一科中文試都肥佬。香港教育制度的確已令好多師生心灰意冷。
越來越多學生問讀書仲有乜用？當一個大學生起薪點只得一萬蚊，捱足幾年，都只係加得雞碎咁多時，好多90後都選擇學門手藝，創業做老闆！
Samantha最近幫好朋友籌備婚禮，對於一位準新娘子嚟講，化妝師當然唔可以亂揀。網上有好多以freelance形式，喺facebook招攬生意嘅化妝師，平則七八千蚊一日，貴嘅竟然要差唔多兩萬銀！化一日妝，就等於一個剛畢業大學生兩個月人工，若一個月接到兩三單生意，閒閒哋就賺到6萬蚊，都真係幾和味！
除化妝師外，仲有好多freelance攝影師、司儀等等，總之講得出同婚禮有關嘅都可以搵到。今時今日，好多新人都捨得花錢搞世紀婚禮，假如讀唔成書，又唔想打工，呢行都不失為一條財路！
Samantha
本欄逢周三、五刊出