一級方程式賽車（F1）呢個星期日喺上海舉行中國站賽事，濰柴動力（2338）趁機正式喺上海宣佈贊助法拉利F1車隊，為期4年。
濰柴董事長譚旭光唔肯透露贊助金額，法拉利汽車副董事長Piero Ferrari就話，係自己主動邀請對方贊助，而且仲一拍即合。
蚊型logo 戰車側腰搵到
濰柴動力嘅logo將會印喺法拉利賽車上面，不過法拉利有咁多個贊助商，印喺邊個位都係問題，濰柴個logo印喺部車側面，仲要細到幾乎睇唔到咁滯，部車停定，都要搵一搵先見到，賽場上，部車「霎」一聲飛過，邊個可以睇到成個公司名嘅嗰位仁兄，都真係幾好眼力。