利豐（494）舊年盤數嚇親街坊，老闆馮國綸仲要放棄先前定落三年賺幾多錢嘅計劃，成班管理層都要打屁股。點知利豐最新年報顯示，行政總裁樂裕民舊年竟然袋走4,931萬元酌情獎金，較前一年多54%，股東睇見可能要大喊一句「可怒也」！
酌情獎金佔年薪九成
不過睇清楚啲，利豐舊年畀樂裕民嘅酌情獎金係按2011年嘅表現而發放，利豐2011年條數係符合市場預期，可能因為咁咪派多啲花紅畀佢囉。
此一時彼一時，利豐舊年條數差咁多，前景又唔知點，馮國綸真係要諗清楚今年派幾多花紅畀樂裕民，如果仲係派得咁好，分分鐘真係激嬲一班股民都未定。其實樂裕民舊年年薪5,425萬元，酌情獎金佔91%，佢應該着緊啲自己嘅工作表現。