中環在線:<br>美聯花紅勁 捽經紀肥老闆 - 李華華

中環在線:
美聯花紅勁 捽經紀肥老闆 - 李華華

繼上月捽數短訊,噚晚市場又流傳一個有關美聯物業(1200)新人事政策嘅WhatsApp短訊(圖),主要話暫停請人,同埋會裁走冇表現嘅經紀,個別分行高層承認收到呢個柯打,唔似俾人惡搞,但美聯執董陳坤興否認管理層出過呢個短訊。姑勿論真定假,經紀都要自求多福了。
地產代理同投資銀行一樣,旺市時員工花紅分得多,淡市就隨時被裁走,只能嘆一句呢行係咁。
美聯舊年盈利增加87%,老闆黃建業同32歲嘅太子女黃靜怡分別袋1,588萬同447萬花紅,較前一年增加1.5倍同87%。除咗花紅,加埋基本薪金同福利,黃靜怡年薪夾埋有908萬元。黃建業底薪加花紅,年薪3,300萬元。
好景不常,𠵱家樓市交投相對淡靜,好似今個月就冇乜大型新盤,業主觀望心態又強烈,二手樓都比較淡靜,經紀惟有醒定啲。