民建聯普選立場緊跟阿爺篩選底線，自然唔多獲想普選嘅普遍市民like啦。副主席李慧琼噚日上港台節目講政改，就不斷畀聽眾圍攻，搞到李慧琼勁冇癮。
首先出招嗰位陳女士，一嚟就問李慧琼乜嘢叫愛國愛港，係咪要好似民建聯咁，只識得阿諛奉承先叫愛國？接力嘅譚生一句「得」埋去，話李慧琼幫中央搖旗吶喊，早前該黨做民調話七成人反對佔領中環，質疑受訪者都係民記嘅「掌心雷」老友記。
仲有人話民建聯原名民主建港聯盟，但唔覺呢廿年為民主做過啲乜嘢喎。
李慧琼重申，民建聯都有批評過國內情況喎。俾人連珠炮發後，李慧琼一臉無奈，唔知以後仲敢唔敢去烽煙節目？