噚日推介招金（1818），金價即創五個月最大跌幅，認真黑仔，事緣塞浦路斯擬售總值四億歐元黃金儲備作再融資，加上高盛唱淡金價明年底見1,270美元。儲局噚晚早洩嘅會議紀錄，多咗委員提出收水建議，亦為金價插水原因之一，但嗰次會議未反映最近新增職位放緩嘅因素，未來收水聲音或會減少，將利好金價表現。噚日招金低開後一度插水4%，尾市成功拗腰，埋單僅跌1.8%，有跟進嘅戰友隨時有微利，可以噚日低位作止蝕位持有。
業績期後，大股東開始出手掃貨，當中以超人增持最受關注。有點石成金效力嘅，原來仲有美聯集團（1200）主席黃建業，佢舊年5月開始密密增持，股價亦開始見底回升，去到8月高見5元，累積升幅達五成。家陣樓市靜過鬼，美聯股價喺低位徘徊，作為代理舵手嘅黃主席，肯定最清楚行情，此時出手或有後着，加上近日有人吹風建議政府為樓市減辣，抄鄰居高明金句︰跟黃建業買美聯！
唐牛