此日吃過午飯，律師H、博士C與中貿林話趁天氣涼，一於自中環行路返金鐘寫字樓，唔坐地鐵。佢地行，左丁山又陪佢地行啫，行到太古廣場與金鐘廊，與佢地講拜拜之後，自己一個人轉頭行返中環，一來一回，用咗四十分鐘，算係午飯後幾好運動。
因為有伴，時間好易過，講起2017年普選之事，大家都明白中央不會放寬控制，點都要未開閘，就知邊隻馬贏嘅啦，但是所謂特首普選，講明操控便是，不要找梁愛詩、吳康民、譚惠珠等人出來講理論，侮辱我地智慧，又話國際公約不必照跟，簡直笑大人嘅口。
香港有冇真正普選呢回事，左丁山參照中國歷史發展，老早在戴卓爾夫人訪問北京之前，在七十年代中已預測中國必然收回香港，以雪鴉片戰爭之國恥。共產黨靠叫民族主義（抗日）口號起家，叫得多，邊會自願放棄1997呢個機會呀，唔收回，中共咪係李鴻章？當年左丁山提出呢點，曾遭同事非議，認為中共會顧及經濟利益，以務實態度處理香港回歸問題。此乃一般受番書仔教育，留學外國回來之精英嘅毛病，就是不懂中國近代史，不了解老共的歷史心理。
好嘞，鄧小平鐵定收回香港之後，香港已成中華人民共和國一部份，唯一執政黨中國共產黨會唔會放棄中央集權（自秦代開始）及一黨專政（自1949開始）嘅歷史傳統呀，香港成為一國兩制特區，已是鄧小平對英國嘅讓步，及務實／顧及經濟利益嘅具體表現。但講到尾，中共重視政治操控權（核心利益）多過維持香港安定繁榮（經濟利益），換句話說，在中共控制中國嘅大前提下，香港只可能有鳥籠民主，鳥籠之大小及開關，由籠主決定。故此2017年之所謂特首普選，乃是從建制派揀一至兩個（如唐英年及梁振英）出選，市民投票選邊個都可以，但候選人名單不得有何俊仁、余若薇之類在內。1992年嘅彭定康早就看出此點，對我地講過：「中國會設計一套選舉制度，預先知道邊一隻馬必勝嘅選舉制度！」呢套就係喬曉陽等人想講嘅，講咪講清楚囉，但唔好叫呢套係民主選舉吖。