哥哥張國榮嘅粉絲遍佈世界各地，原來新民黨副主席田北辰都係「哥迷」之一，佢早前出席香港警察員佐級協會創建人暨退役同僚聯會時，即席獻唱哥哥金曲《風繼續吹》助興，話要憑歌寄意悼念偶像。
田二少歌喉屬K房水平，勝在感情夠晒投入，唱唱吓仲出埋假音；如果唔係間中甩beat，都算唔錯。大會之後安排一個好似八十年代登台身穿銀色閃片衫嘅「型男」同二少合唱一曲《Monica》。二少見到對方行頭咁勁，似乎都有少少嚇親，獻唱時反而唔夠之前咁自若，動作略嫌生硬，但拍檔就交足貨，全程印印腳左扭右扭，炒熱全場氣氛。想笑吓嘅不妨上YouTube： http://www.youtube.com/watch?v=JEowZ4-HoG4