【跑馬地】自從陳凱韻（甘比）同劉鑾雄（大劉）生咗細仔「Mini大劉」Joseph Junior之後，更加得寵，復活節期間就試過「三連莊」陪大劉去開餐，甚受大劉愛錫。事實上佢又真係抵錫嘅，佢好畀心機照顧對仔女，仲親自接送自己嘅小朋友，唔會假手於人。
大前日5點半左右，甘比架車牌「1 L0VEU2」嘅七人車同一架保鑣車，停咗喺跑馬地，同時見到三名大劉嘅保鑣在場。當時因為落緊大雨，所以其中一個保鑣負責擔遮，另一個就負責拉住度閘門。而秉承大劉愛清潔嘅習慣，每位保鑣都會手拿紙巾用嚟開門，今次都冇例外。
囡囡眼睩睩
大概1分鐘之後就見到甘比拖住參加完課外班嘅囡囡秀樺落樓，第三位保鑣已經急步上前，幾個保鑣開住幾把遮護主認真大陣仗。其間仲見到唔少菲籍傭工接其他小朋友走，甘比雖然身為億萬富豪嘅女朋友，但佢都好識做咁逐一同佢哋講再見。當佢準備上車之前，記者出身嘅甘比已經發現記者影相，囡囡亦繼承父親嘅豪氣，眼仔睩睩望住記者影相，好鬼趣緻。
採訪、攝影：梁繼光、陳辰
想睇更多首輪猛片介紹同預告片？《一台戲》為你網羅最新電影介紹及影評↓↓↓↓
http://hk.movies.nextmedia.com/