有公務員噚日晏晝同八方講：好咯，一天都光晒咯。八方仲以為乜嘢事，原來特區政府噚日終於公佈，再次委任吳榮奎出任公務員敍用委員會主席，任期由下月起至明年4月底，為期一年。公務員敍用委員會係乜東東？查實係個獨立法定組織，主要就住公務員嘅聘用、晉升同紀律事務，向特區政府提意見。
AO之前巧京京，事緣政圈流傳，梁振英有意喺吳榮奎任期屆滿後搵羅范椒芬接替。嘩，飯焦係官場鬼叫愁，佢嘅奪命凶鈴都唔知嚇親幾多人，難怪AO聽到呢個傳聞都嚇破膽，好驚命運掌握喺飯焦手上。唔知係最後係有人反對、抑或梁振英打退堂鼓呢？吳榮奎最後冧莊，皆大歡喜。