噚日舉行嘅中文科listening文憑試，竟爆出補習社所賣嘅收音機可干擾其他考生疑雲，星級教師矢口否認，直指「全攻型收音機」長處在於收得更清楚。誰是誰非難以定案，但一部收音機賣兩嚿水，補習社呢個交叉銷售真係做得唔錯，證券行都可以考慮出番個「快人一步落盤keypad」，話唔定大賣。
北韓揚言噚日發射導彈，但一路未有消息，好友終按捺不住發動攻勢，恒指尾市一句鐘升近200點，收市重越22000關。戰事若升溫，黃金有避險作用，戰友可向金礦股埋手，又以招金礦業（1818）與金價走勢最貼近，今年關聯系數達0.92。儲局噚晚公佈議息會議紀錄，大家關注有否提及收水，唐牛覺得美國經濟復蘇勢頭良好，但未夠穩定，就業數據偶有波動，印銀紙活動難言完結，金價又多一份支持。招金去年中開始形成雙底走勢，以10月跌浪反彈0.382倍作目標，可見11.20元，較昨收9.92元，有13%潛在升幅。
唐牛