碼頭工潮揭發香港繁榮背後嘅陰暗面，工人包「糯米雞」，喺貨櫃上面做「空中飛人」，非人道工作環境猶如時光倒流，相信唔單止巿民嚇一跳，連宗教領袖都睇唔過眼。
八方噚日去咗中大，見證六大宗教領袖，向中大送出118份珍貴文獻同埋3,000幾張相片，其中一份係六宗教首長喺1981年首次發表嘅聯合新春獻詞，當年幾位宗教「大佬」原來已經提到香港工業意外嘅「畸屎」不斷增加，呼籲社會人士關注點防範同補救。好可惜，32年後嘅今日，碼頭仍然工傷不斷，外判商長期「私了」，當年有份簽呢份獻詞、已經仙遊咗嘅天主教香港教區主教胡振中，見到咁嘅局面，唔知有乜嘢感想。