鐵娘子死後，第一個遇上的是鄧小平。
老鄧抽住煙，失驚無神往地下吐痰，以功夫鞋擦了濃痰幾下，對鐵娘子笑嘻嘻打招呼：「哈囉戴師奶，做乜咁遲，等住你開枱。」鐵娘子瞪老鄧一眼，正想罵他胡說八道，但奇在一開口，自己也港式app話上身，回敬：「見到你個五十年不變的煙鏟衰樣，就知道你上唔到天堂。」事實上，自從Ｎ年前戴師奶在人民大會堂經典一仆之後，她已經打定輸數，將香港交還中國，絕對拿不到天堂入場券。「共產黨搞到香港人要佔領中環，鄧矮子，你們到底知唔知醜字點寫？」老鄧哇叉一聲把痰吐到離鐵娘子的皮鞋僅僅兩厘米外，扯氣說：「沒有我們強國同胞，香港餓死好耐！英國旅遊景點，蚊都冇隻都似！還有，你睇清楚自己套壽衣嘜頭，都係中國製造！」鐵娘子質問：「點解唔俾香港行真普選？早知係咁，當初請你們食雪糕算了，五十蚊人民幣都慳番！」鐵娘子嬲到轉身就走，不偏不倚，踩在老鄧那口濃痰上，又試再仆一次，撻到攤攤腰！爭取普選，佔領中環，預咗要仆Ｎ次街，踩中Ｎ篤阿爺痰，撻Ｎ次生魚。